БИЫЛ АРПА МЕН БИДАЙ ӨНІМДІ

Шілденің аптап ыстығы Қордай ауданының диқандары үшін ерекше қарқынды жұмыспен тұспа-тұс келді. Аудандық ауыл шаруашылығы бөлімінің мәліметінше, биыл 68400 гектар жерге дәнді дақылдар себілген. Оның ішінде 46200-і арпа болса, 22 мыңнан астамы күздік бидай. Қазіргі таңда алдыңғы қатарлы шаруашылықтар піскен егісті жинауға кірісіп кеткен, деп хабарлайды taraz24news ақпарат агентігінің тілшісі.

Егіс науқанына 641 трактор мен 97 комбайн жұмылдырылыпты. Бүгінде жалпы егіс көлемінің 6000 гектарға жуығы орылып біткен. Әзірше орташа өнімділік гектарына 20 центнерден түсіп отыр. Осыған орай, жуырда ауылшаруашылық бөлімінің басшысы Бақдәулет Садырбаев, ауданның бас агрономы Евгений Трубниковпен бірге «Бәйтерек» шаруа қожалығын аралап шықты.

 Евгений ТРУБНИКОВ АГРОНОМ

Биыл 40 га жерге «Эвклид» атты француздық тұқымды ектік. Оны қазір өздеріңіз көріп отырсыздар. Шығымы жақсы, гектарынан 56 центнерден түсіп жатыр. Былтырғы қуаңшылық кезінде де осы «Эвклид» жақсы нәтиже беріп, гектарынан 17 центнерден алған едік. Келесі жылы егістігіміздің көп бөлігіне аталған тұқымды егуді жоспарлап отырмыз…

 Одан бөлек шаруашылықта отандық «Бригада», «Гром», «Этнос» секілді ресейлік тұқымды тәжірибеден өткізуде. Агрономның айтуынша, 1500 га жуық жерге дәнді дақылдар егіліп, тыңайтқыштар да себілген. Шаруашылықта техниканың барлығы су жаңа. Ал, диқандар дәнді дақылдарды ору науқанын бір жарым айдың ішінде аяқтауды жоспарлап отыр. Оның үстіне биылғы ауа райы да өсімдіктер үшін қолайлы. Енді, мол өнімге үміттеніп отырмыз, – дейді жауаптылар.

                                                                                                                        Ақкенже Асанқызы АЙМАҚ

Leave a Reply

Your email address will not be published.