ӘЛЕУМЕТТІК ШЫҒЫНДАРДЫҢ ТИІМДІЛІГІ ТАЛҚЫЛАНДЫ
Қызылорда облысында «Әлеуметтік салаға бағытталған бюджет қаражатын тиімді пайдалану» тақырыбында республикалық семинар-кеңес өтті. Іс-шараға орталық және жергілікті мемлекеттік органдардың өкілдері, облыс әкімдерінің орынбасарлары, өңірлік басқармалар басшылары, аудан әкімдері, мәслихат депутаттары мен сарапшылар қатысты,- деп хабарлайды «Taraz24news.kz» ақпараттық агенттігі primeminister.kz сайтына сілтеме жасап.
Семинардың мақсаты – білім беру, денсаулық сақтау, жұмыспен қамту, әлеуметтік қорғау, туризм және спорт салаларындағы бюджет қаражатын тиімді пайдалану тетіктерін талқылау және жергілікті деңгейде цифрлық шешімдерді енгізу.
Пленарлық отырысты Премьер-министрдің орынбасары Ермек Көшербаев ашып, әлеуметтік көмектің атаулылығын және әділдігін қамтамасыз етудің маңызын атап өтті. Оның айтуынша, республикалық бюджеттің 40%-дан астамы әлеуметтік салаға бағытталады, ал басты міндет – мемлекеттік қолдау шын мәнінде мұқтаж азаматтарға жетуі.
Жиында Жоғары аудиторлық палата мен министрліктер анықтаған әлеуметтік төлемдерді мақсатсыз пайдалану деректері қаралды. Олардың қатарында заңсыз жәрдемақы алу, жұмыссыздық пен декреттік төлемдер бойынша алаяқтық, зейнетақы қорындағы қаражатты мақсатсыз жұмсау және әлеуметтік көмекті жағдайы бар отбасылардың пайдалануы секілді мысалдар келтірілді.
Еңбек және халықты әлеуметтік қорғау министрлігінің мәліметінше, 2025 жылғы 1 тамыздағы жағдай бойынша 429 мың жұмыссыз тіркелген. Бұл мақсатқа 127 млрд теңге қарастырылғанымен, кейбір жағдайларда көмекке мұқтаж емес азаматтардың да жәрдемақы алғаны анықталған.
Қызылорда облысында жүргізілген кешенді талдау нәтижесінде тиімсіз шығыстар қысқартылып, шамамен 100 млрд теңге үнемделген. Үнемделген қаржы әлеуметтік инфрақұрылымды дамытуға және аз қамтылған отбасыларды қолдауға бағытталған. Облыс әкімі Нұрлыбек Нәлібаев бұл тәжірибені өзге өңірлерде қолдануға болатынын атап өтті.
Еңбек және халықты әлеуметтік қорғау министрі Светлана Жақыпова әлеуметтік шығыстарды оңтайландыруға қатысты орталық органдардың тәжірибесімен бөлісіп, негізгі мақсат – әлеуметтік қорғау жүйесін әділеттірек және тиімдірек ету екенін айтты. Оның айтуынша, 2024 жылы әлеуметтік салаға 6,1 трлн теңгеден астам қаржы бөлінген.
Семинар қорытындысында халық арасында түсіндіру жұмыстарын күшейту тапсырылды. Үкімет әлеуметтік шығыстардың атаулылығын арттыруға және бюджет қаражатының әділ бөлінуін қамтамасыз етуге бағытталған жұмысты жалғастырады.
