ӘДІЛЕТТІ ҚАЗАҚСТАННЫҢ НЕГІЗІ – «ЗАҢ МЕН ТӘРТІП» ҚАҒИДАСЫ
Президент Қасым-Жомарт Тоқаев Қазақстан халқына арнаған Жолдауында ел дамуының басты тірегі – заңдылық пен тәртіп екенін атап өтті. Мемлекет басшысы әрбір азамат өзін қауіпсіз сезінетін және мемлекеттік институттарға сенім артатын жүйе қалыптастыруды тапсырды, – деп хабарлайды «Taraz24news.kz» ақпараттық агенттігі primeminister.kz сайтына сілтеме жасап.
ҚҰҚЫҚТЫҚ ТӘРТІП ПЕН ПАТРУЛЬДІК ҚЫЗМЕТ
ҚР Ішкі істер министрлігінің деректеріне сәйкес, күн сайын елімізде 14 мыңнан астам полиция қызметкері мен Ұлттық ұлан әскери қызметшілері құқықтық тәртіпті қамтамасыз етеді. Қазіргі таңда 15 мыңнан астам патрульдік маршрут жұмыс істейді. Нәтижесінде биылғы жылдың жеті айында қылмыстардың жалпы саны 13%-ға қысқарды. Кісі өлтіру, қарақшылық, ұрлық, бұзақылық фактілері азайған. 10 мыңнан астам қылмыс ашылып, 10 млн-ға жуық әкімшілік құқық бұзушылықтың жолы кесілді.
ЦИФРЛАНДЫРУ ЖӘНЕ БЕЙНЕБАҚЫЛАУ
Қоғамдық қауіпсіздікті арттыру үшін ел бойынша 19 мыңнан астам бейнекамера орнатылған. Олардың бір бөлігі жасанды интеллект жүйесімен жабдықталған: бет-әлпетті таниды, көлік ағынын бақылайды, күдікті заттарды анықтайды. Бұл жүйелер Жедел басқару орталықтарымен интеграцияланып, оқиғаларға дер кезінде әрекет етуге мүмкіндік беруде. Сонымен қатар полиция қызметкерлері планшеттермен және смарт-жетондармен қамтамасыз етіліп жатыр. «102» мобилді қосымшасы арқылы азаматтар құқық бұзушылық туралы жылдам хабарлай алады.
ӘЙЕЛДЕР МЕН БАЛАЛАРДЫ ҚОРҒАУ
Тұрмыстық зорлық-зомбылыққа қарсы жаңа заңнамалық шаралар қабылданды. 2024 жылдың жеті айында 8 мыңнан астам қылмыстық іс тіркеліп, 56 мыңнан астам қорғау нұсқамасы шығарылды. 19 мыңнан астам құқық бұзушы әкімшілік қамауға алынды. Мыңдаған әйел мен балаға дағдарыс орталықтарында көмек көрсетілді. Бұл – мемлекет тарапынан осал топтардың қауіпсіздігін қорғауға бағытталған нақты қадам.
ҚАРЖЫЛЫҚ АЛАЯҚТЫҚҚА ҚАРСЫ ІС-ҚИМЫЛ
Интернет-алаяқтық қылмыстарының өсуіне байланысты ІІМ жүйелі шаралар қабылдап отыр. Соңғы айларда 2,6 млрд теңгеден астам қаржы ұрлығының алдын алу мүмкін болды. 88 мыңнан астам SIM-карта тәркіленді, ал 67 млн-нан астам жалған халықаралық қоңыраудың жолы кесілді. Қаржылық сауаттылықты арттыру мақсатында мектептерде, колледждерде және зейнеткерлер арасында ақпараттық семинарлар өткізіліп келеді.
ЕСІРТКІ ЖӘНЕ ЭКСТРЕМИЗММЕН КҮРЕС
2024 жылдың жеті айында есірткіге қатысты 4,6 мыңнан астам қылмыс әшкереленді. 13 ұйымдасқан қылмыстық топ жойылып, 11 тоннадан астам есірткі мен 23 тонна химиялық зат тәркіленді. Сонымен қатар, экстремизмге қарсы іс-шаралар нәтижесінде 44 қылмыстық құқық бұзушылық тіркеліп, оның 23-і сотқа жолданды.
ЖОЛ-КӨЛІК ҚАУІПСІЗДІГІ
Жыл басынан бері жолдарда 25 мыңнан астам тексеру жүргізіліп, 8,5 млн жол қозғалысы ережесін бұзу фактісі тіркелді. Оның ішінде 14 мыңнан астам жүргізуші мас күйінде көлік тізгіндеген. Дрондар мен автоматты бақылау жүйелері енгізіліп, нәтижесінде республикалық трассалардағы апаттардан қаза тапқандар саны 12%-ға азайды.
ЗАҢНАМАНЫ ЖЕТІЛДІРУ ЖӘНЕ ҚҰҚЫҚТЫҚ САУАТ
Әділет министрлігі заңнаманы жетілдіру, құқықтық рәсімдерді жеңілдету және сот төрелігін қолжетімді ету бағытында жұмыс жүргізіп келеді. Онлайн-қызметтер дамып, азаматтарға соттарға және мемлекеттік органдарға тікелей электронды түрде жүгіну мүмкіндігі кеңейді. Сонымен қатар, халықтың құқықтық сауатын арттыруға арналған тұрақты ағартушылық шаралар ұйымдастырылуда.
АДАМ ҚҰҚЫҚТАРЫН ҚОРҒАУ
Кемсітушілікке қарсы және азаматтардың құқықтарын қорғауға бағытталған жаңа тетіктер іске асуда. Бұл қадамдар Қазақстанның құқықтық мемлекет ретіндегі беделін нығайтып, халықаралық деңгейде қолдау табуда.
