ҚАЗАҚСТАН ЭКОНОМИКАСЫ 2025 ЖЫЛДЫҢ ЖАРТЫ ЖЫЛДЫҒЫНДА РЕКОРДТЫ ӨСІМ КӨРСЕТТІ

Мемлекет басшысы Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауында Үкімет пен әкімдерге экономиканың құрылымын өзгерту, тұрақты даму тетіктерін қарастыру және инвестициялық ахуалды жақсарту жөнінде нақты тапсырмалар берілген болатын, деп хабарлайды «Taraz24news.kz» ақпараттық агенттігі, primeminister.kz сайтына сілтеме жасап.

Президент Үкіметке экономикаға салынатын тікелей инвестиция көлемінің төмендеуіне жол бермеуді, сондай-ақ бизнесті жүргізуге қолайлы жағдай қалыптастыруды міндеттеген.

Primeminister.kz сайтындағы деректерге сәйкес, 2024 жылдың қорытындысы бойынша елдің жалпы ішкі өнімі 5%-ға өсіп, жоспарлы көрсеткішке қол жеткізілді. Ал 2025 жылдың бірінші жартыжылдығында Қазақстан экономикасының даму қарқыны айтарлықтай жақсарған.

Мемлекет басшысы алдағы кезеңде ел экономикасын 2029 жылға қарай екі есеге арттыруды мақсат етіп отыр. Бұл бағыттағы жұмыстар инвестицияларды ынталандыру, өнімділікті арттыру және шикізаттық емес салаларды дамыту арқылы жалғасуда.

Биылғы жеті айдың қорытындысы бойынша ел экономикасының өсімі соңғы жылдардағы рекордтық көрсеткіш – 6,3%-ды құрады. Оның ішінде нақты сектор 8,3%-ға, қызмет көрсету саласы 5,2%-ға артқан.

Негізгі салалардағы өсім мынадай болды: көлік – 22,5%, құрылыс – 18,5%, сауда – 8,6%, тау-кен өнеркәсібі – 8,5%, өңдеу секторы – 6,1%.