АСТАНАДА ҚАЗАҚСТАН-ИОРДАНИЯ БИЗНЕС-ФОРУМЫ ӨТТІ
2025 жылғы 27 тамызда Астанада Қазақстан Президенті Қасым-Жомарт Тоқаев пен Иордания Королі ІІ Абдалла екі елдің іскерлік орта өкілдері қатысқан Қазақстан-Иордания бизнес-форумына қатысты, деп хабарлайды «Taraz24news.kz» ақпараттық агенттігі, akorda.kz сайтына сілтеме жасап.
Форум барысында Мемлекет басшысы Король ІІ Абдалланы ресми сапармен қарсы алу зор мәртебе екенін атап өтті. Президент Қазақстан мен Иордания арасындағы серіктестікті нығайтуға қосқан үлесі үшін ризашылығын білдіріп, екі елдің экономикалық байланыстарын жаңа деңгейге көтеру қажеттігін айтты.
Қасым-Жомарт Тоқаев форум аясындағы келіссөздер өзара тиімді ықпалдастықты тереңдетуге жол ашатынын жеткізді. Оның айтуынша, Қазақстан экономикасы биылғы жеті айда 6,3 пайызға өскен, бұл көрсеткішке өнеркәсіп, сауда және көлік салалары айтарлықтай үлес қосқан. Мемлекет басшысы серіктестік түрлі секторда өркендеуге мүмкіндік беретініне сенім білдірді.
Сондай-ақ Қазақстанның стратегиялық көлік дәліздері, Каспий порттарының әлеуеті, атом энергетикасы, агробизнес, медицина, фармацевтика және цифрландыру салалары бойынша ынтымақтастық мәселелері сөз болды. Президент Иорданиялық кәсіпкерлерді «Астана» халықаралық қаржы орталығының мүмкіндіктерін пайдалануға шақырды.
Өз кезегінде Король ІІ Абдалла форумға қатысушыларға алғысын білдіріп, экономикалық ынтымақтастықты тереңдетуге дайын екенін жеткізді. Ол екі ел компаниялары арасындағы байланыстардың ұзақ мерзімді серіктестікке ұласатынына сенім артты.
