ТАРАЗДА ХАЛЫҚАРАЛЫҚ ЖИЫН ӨТТІ
Таразда кешегіден бері мықты-мықты деген дәрігерлер жүр. Тіптен, олардың қатарында дүниежүзілік денсаулық сақтау ұйымының, ТМД елдеріндегі медицина саласының үздіктері бар. Жиналудағы басты мақсаттары – бір-бірімен тәжірибе алмасу. Ал, неліктен халықаралық конгерске басқа емес, Жамбыл облысы таңдалды? Ардана Жарылқасын айтсын.
Тараз төрінде өткен халықаралық деңгейдегі конгресс “Медициналық-санитарлық алғашқы көмек инновациялары” тақырыбында өтті. Мұнда мықты дәрігерлер медициналық және әлеуметтік қызметтерді интеграциялау қажеттігін талқыға салды. Мәртебелі меймандарды облыс басшысының өзі күтіп алды.
Нұржан НҰРЖІГІТОВ ЖАМБЫЛ ОБЛЫСЫНЫҢ ӘКІМІ
Бұл конгрессті Тараз қаласында өткізу бастамасы біз үшін үлкен мақтаныш.
Медицина мамандары бір ғана бағытта емес жан-жақты болуына ерекше екпін берілуде. Сондықтан пікірталас алаңында дәрігерлерді көпсалалы етіп бейімдеудің жаңа тәсілі де қозғалды. Дәрігерлер түрлі бағытта бір-бірімен тәжірибе алмасып, жаңа идеялармен де бөлісті.
Азамат ДҮЙСЕНОВ ҚР ДЕНСАУЛЫҚ САҚТАУ МИНИСТРЛІГІ МЕДИЦИНАЛЫҚ КӨМЕКТІ ҰЙЫМДАСТЫРУ ДЕПАРТАМЕНТІНІҢ ДИРЕКТОРЫ
Өздеріңізге белгілі денсаулық сақтау жүйесінде алғашқы медициналық-санитарлық көмек ерекше маңызға ие. Бұл медициналық қызметкерлер мен пациенттердің тікелей байланысын қамтамасыз ететін, медициналық көмекті тұрғылықты жеріне барынша жақындататын және денсаулық сақтаудың үздіксіз процесінің бірінші элементін құрайды. Халықтың өмір сүру ұзақтығының ұлғаюы және мезгілсіз, алдын алуға болатын өлім-жітімнің төмендеуі сияқты көрсеткіштер денсаулық сақтаудың бастапқы буынының сенімділігі мен тиімділігіне тікелей байланысты.
Айта кетейік, бұл жиынның Жамбыл облысында өтуінің өз себептері бар. Аймақта соңғы жылдары бұл салада көптеген жаңашылдықтар енгізіліп, дәрігерлер ота жасаудың жаңа тәсілдерін меңгеруде. Жалпы өңірде 388 медициналық ұйым бар. Оның 26 аурухана, 24 амбулаториялық емхана, 122 дәрігерлік амбулатория, 53 фельдшерлік-акушерлік пункт, 142 медициналық пункт.
