ЗОРЛЫҚ-ЗОМБЫЛЫҚҚА ҚАРСЫ КҮРЕС
Тараз қаласында әйелдерге қатысты зорлық-зомбылықтың алдын алу істерінің халықаралық күніне орай «Гендерлік зорлық-зомбылыққа қарсы 16 күн белсенді іс-әрекет» акциясы өтті, деп хабарлайды «Taraz24news.kz» ақпараттық агенттігі. Іс-шараның негізгі мақсаты — тұрмыстық зорлық-зомбылықтың алдын алу, жәбірленушілерге құқықтық көмек көрсету және қоғамда осы мәселеге қатысты сананы көтеру.
Биылғы жылы акция «Гендерлік зорлық-зомбылыққа қарсы 16 күн белсенді іс-әрекет» ұранымен ұйымдастырылды. Іс-шараға қатысушылардың пікірінше, қоғам отбасылық-тұрмыстық зорлық-зомбылықтың қылмыс екенін түсінуі қажет. Акцияның негізгі міндеті — қоғам назарын зорлық-зомбылыққа аудару, отбасы-тұрмыстық қатынастардағы құқық бұзушылықтарды азайту және профилактикалық жұмыстар арқылы зорлық-зомбылыққа бейім тұлғаларды анықтау.
Тараз қаласы ПБ бастығының орынбасары Берік Сәлемов іс-шара барысында тұрғындарды құқықтық сауаттандыруға шақырды. «Біз болашақ ұрпақ үшін, әйелдерге және отбасылық тұрмыста құқық бұзушылыққа барушыларға қатысты құқықтық шараларды қолданамыз. Барлық тұрғындарды осы бағыттағы жұмыстарға қатысуға шақырамыз», — деді ол.
Іс-шара барысында тұрғындарға тұрмыстық зорлық-зомбылықтың криминологиялық және әлеуметтік салдары түсіндіріліп, ана мен баланы қорғау, отбасының рөлін күшейту бағытында қабылданып жатқан шаралар таныстырылды. Айта кетейік, 2024 жылы ҚР Ішкі істер министрлігі жанынан Тұрмыстық зорлық-зомбылыққа қарсы күрес жөніндегі арнайы басқарма құрылған. Сонымен қатар, облыс көлемінде мамандандырылған бөлімшелер өз қызметін жүзеге асыруда.
