ЖАМБЫЛ ОБЛЫСЫНДА «АДАЛ АЗАМАТ: АУЫЛ МЕКТЕБІНІҢ КЕЛЕШЕГІ» СЕМИНАР-ТРЕНИНГІ ӨТТІ
Жамбыл облысында ауылдық білім беру жүйесін дамытуға және педагогтердің кәсіби әлеуетін нығайтуға арналған «Адал азамат: ауыл мектебінің келешегі» семинар-тренингі өткізілді, деп хабарлайды «Taraz24news.kz» ақпараттық агентігі.
Іс-шара Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссиясы, «Ауыл» партиясы және Жамбыл облысы әкімдігінің бірлескен ұйымдастыруымен ұйымдастырылды.
Мемлекет басшысы Қасым-Жомарт Тоқаев өз сөзінде Қазақстанның тұрақты дамуы мықты, интеллектуалды және адал ұрпақ тәрбиелеуге тікелей байланысты екенін атап өтті. Президенттің пікірінше, қоғамдық құндылықтарды жаңғырту, жауапкершілігі жоғары, әділетті және еңбекқор азамат қалыптастыру — білім беру саласындағы мемлекеттік саясаттың стратегиялық бағыты.
Семинар жұмысына ауыл мектептерінің басшылары мен педагогтері, ата-аналар комитеттерінің өкілдері, облыстық және аудандық білім басқармаларының мамандары, сондай-ақ әкімдіктер жанындағы әйелдер істері және отбасылық-демографиялық саясат жөніндегі комиссия мүшелері қатысты.
Іс-шараны ашқан ҚР Парламенті Мәжілісінің депутаты Ерболат Саурықов ауыл мұғалімдерінің рөлін ерекше атап өтті. «Ауыл мұғалімі — бір ғана ауылдың емес, бүкіл елдің дамуына ықпал ететін негізгі тұлға. Бүгінгі семинар педагогтердің кәсіби өсуіне жаңа серпін беретін маңызды алаң», — деді депутат. Ол ұстаздарды қолдау шараларын кеңейтудің маңыздылығына назар аударды.
Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссия мүшесі Айгерім Сарсенбаева бұл бастаманың отбасы институтын нығайту және білім беруде тең мүмкіндіктерді қамтамасыз ету саясатына сәйкес келетінін айтты. «Ауыл мектебі — ауылдың ертеңі, оның болашағы. Балалардың сапалы білімге қол жеткізуі — тек мектептің емес, бүкіл қоғамның ортақ міндеті», — деді ол.
«Ауыл» партиясы төрағасының орынбасары Қуаныш Сейтжанов Президенттің соңғы жарлығымен бекітілген Қазақстан Республикасының ішкі саясатының қағидаттары мен бағыттарын түсіндіру тұрғысынан іс-шараның маңызын атап өтті. Жамбыл облысы білім басқармасы басшысының орынбасары Ләззат Қызылқұлова өңірдегі педагогтердің біліктілігін арттыру бағытындағы бағдарламалар туралы ақпарат берді.
Пленарлық отырыста Л.Н. Гумилев атындағы Еуразия ұлттық университетінің оқытушысы Руслан Қаратабанов «Адал азамат» білім беру бағдарламасының нәтижелерімен бөлісті. Ы. Алтынсарин атындағы Ұлттық білім академиясының аға ғылыми қызметкері Алмагүл Мукушева ауыл мектептерін дамытудың жаңа тұжырымдамалық тәсілдерін таныстырды.
Секциялық талқылаулар барысында интернет және ойынға тәуелділіктің алдын алу, жасанды интеллектті оқу процесіне енгізу, ауыл түлектерінің халықаралық білім бағдарламаларына қолжетімділігін кеңейту, сондай-ақ мектеп пен жергілікті қауымдастық арасындағы коммуникацияны нығайту мәселелері қаралды.
Практикалық ұсыныстарымен Эльмира Әлиева, Айнұр Аужанова, Тойжан Омарова және София Абдуразакова бөлісті.
Семинар-тренинг қорытындысы бойынша қатысушылар ауыл мектептеріндегі білім сапасын арттыруға бағытталған бастамаларды жүйелі және ұзақ мерзімді қолдаудың маңыздылығын ортақ ұстаным ретінде бекітті.
