ҮКІМЕТ БІРІНШІ ЖАРТЫЖЫЛДЫҚТА ЖІӨ-НІҢ 6,2%-ҒА ӨСУІН ҚАМТАМАСЫЗ ЕТТІ – ПРЕМЬЕР-МИНИСТР НАҚТЫ МІНДЕТТЕР ЖҮКТЕДІ
Бүгін Премьер-министр Олжас Бектеновтің төрағалығымен өткен Үкімет отырысында 2025 жылдың алғашқы алты айындағы әлеуметтік-экономикалық даму қорытындылары мен республикалық бюджеттің атқарылуы қаралды,-деп хабарлайды «Taraz24news.kz» ақпараттық агентігі, primeminister.kz сайтына сілтеме жасап.
Күн тәртібіндегі негізгі мәселе — Мемлекет басшысының экономиканы әртараптандыру және ұзақмерзімді тұрақты өсімді қамтамасыз ету жөніндегі тапсырмаларын іске асыру барысы.
Экономиканың жалпы ахуалы туралы Ұлттық экономика министрі Серік Жұманғарин баяндаса, қаржы және ақша-несие саясаты бойынша есептерді Ұлттық Банк төрағасы Тимур Сүлейменов пен Қаржы министрі Мәди Тәкиев ұсынды. Сонымен қатар салалық министрлер мен өңір әкімдері бірқатар бағыттағы жағдайды сипаттап өтті.
Алдын ала мәліметтер бойынша, биылғы қаңтар-маусым айларында Қазақстанның жалпы ішкі өнімі 6,2%-ға өсті. Бұл өсім құрылыс, өнеркәсіп, сауда және байланыс салаларындағы іскерлік белсенділікпен байланысты.
Отырыс барысында Премьер-министр экономикалық көрсеткіштердің жақсаруы қабылданған кешенді шаралардың нәтижесі екенін атап өтті. Оның ішінде – инвестиция тарту, инфрақұрылымды жаңарту, цифрлық шешімдерді енгізу және кәсіпкерлікке қолдау.
— «Үкімет Мемлекет басшысының тапсырмаларын орындау мақсатында нақты жүйелі шешімдер қабылдап отыр. Негізгі көрсеткіштер бойынша оң серпін бар. Мысалы, ірі жобалар басталып жатыр, суперкомпьютер кластері іске қосылды – бұл цифрландыруды тереңдетуге жол ашады», – деді Олжас Бектенов.
Премьер-министр шетелдік инвестиция тарту мен жоғары технологиялық өнім өндіруді күшейту қажеттігін баса айтты. Сонымен бірге арнайы экономикалық және индустриялық аймақтарда инфрақұрылымды жедел салуды, көлік дәліздерін кеңейтуді, соның ішінде 3000 шақырым жолды күрделі жөндеуден өткізуді тапсырды. Бұл шаралар теміржол және әуе жүк тасымалын бірнеше есеге арттыруға мүмкіндік береді.
Ауыл шаруашылығына қатысты да нақты тапсырмалар берілді: өнім сақтау мен өткізу жүйесін жетілдіру, аграрлық маркетплейс әзірлеу, басым дақылдардың егістік көлемін ұлғайту. Ал күзгі егін орағы мен жылыту маусымына дайындық шеңберінде ішкі логистиканы күшейту көзделіп отыр.
Мұнай-газ секторында «Теңіз» кен орнындағы кеңейту жобаларын және газ өңдеу зауыттарын іске асыруды жеделдету қажет. Сонымен қатар, Үкіметке инфляцияны тежеу жөніндегі кешенді іс-шараларды сапалы орындау міндеттелді.
— «Баға тұрақтылығы – Үкімет пен әкімдіктер үшін басты басымдықтардың бірі. Ішкі нарықты тауармен қамтамасыз етіп, делдалдық схемаларды анықтауға басымдық беру керек», – деді Үкімет басшысы.
Жалпы, Премьер-министр барлық салада нақты, бағытталған шараларды уақытында жүзеге асыру – экономиканың тұрақты өсімін қамтамасыз етудің негізгі шарты екенін атап өтті.
