АБЫСЫН-АЖЫНДАР СЫНҒА ТҮСТІ
«Абысын тату болса ас көп, ағайын тату болса ат көп» деп дана халқымыз текке айтпаған. Жамбыл ауданында да татулықтың тамаша үлгісін көрсетіп жүрген абысындар жетерлік. Ұлттық құндылықтар мен салт-дәстүрлер дәріптелетін наурыз мерекесінде абысын-ажындар бірге бақтарын сынады.
Иіліп сәлем салған келіндердің бәрі әулеттің абыройын асқақтатып, мерейін өсірді. Байқауда бағын сынаған абысын-ажындардан құралған командалар татулықты ту етіп, бірге өнерлерін көрсетті. Жамбыл ауданында өткен өнегелі іс-шараға бас-аяғы 22 келіншек қатысып, 4 бөлім бойынша сынға түсті. Өздері тіккен қолөнер бұйымдарын, ұлттық тағам түрлерін әзірлеп қазылар алқасына таныстырды.
Абысын тату болса деген сайысқа біз Ерназар ауылдық округінен абысындар, бір әулеттің абысындары осы сайысқа әулетіміздің абыройын асқақтату үшін келіндік міндетімізді жоғары ұстау үшін келіп тұрмыз. Қазақ келіндері қандай болатынын, қазақ келіндері қалай қызмет жасайтынын, қандай өнері болатынын көрсетуге барымызды саламыз, – деді байқау қатысушысы Динара Әбілдаева.
Қазақ келіндеріне тән ибалылық пен әдептілік дәріптеліп, ісмерлік пен аспаздық қабілет бағаланған байқаудабас жүлде Аса ауылдық округіннің атынан қатысқан абысын-ажындарға бұйырды. Айшабибі, Гродиково мен Қызылқайнар ауылдық округінен келген келіндер үздік үштікке ілікті. Дәстүрге сай жеңімпаздар мен жүлдегерлер арнайы дипломдармен марапатталды.
Автор: Мөлдір Аманбай
