ЖАМБЫЛДЫҚТАР ТЕГІН КИНО КӨРЕ АЛАДЫ
Жамбылдықтар үшін жағымды жаңалық. 10 күн бойы аудан және қала тұрғындары мәдениет үйлерінен тегін кино көре алады. Себебі, Ұлттық киноны қолдау орталығы еліміздің түпкір-түпкірінде «Қазақ киносының он күндігін» өткізіп жатыр. Сәйкесінше былтыр ғана прокатқа шыққан «Жамбыл – жаңа дәуір», «Қажымұқан» және «Дос-Мұқасан», «Операция Набат», «Время патриотов» секілді 12 фильмді көруге мүмкіндік бар. Аталмыш картиналар рухани құндылықтар мен ел тарихын, қазақ халқының болмысын баяндайды Іс-шара аясында көрермендерге ҚР Мәдениет және ақпарат министрлігінің, сондай-ақ Кино орталығының қолдауымен түсірілген бірқатар фильмдер ұсынылған. Алғашқы көрсетілім Қарағанды облысынан басталып, Жамбыл облысымен жалғасты. Ендігі кезекте шара өзге қалалар мен ауылдық округтерде де ұйымдастырылады.
– Бізге Ұлттық киноны қолдау орталығы «Жамбыл – жаңа дәуір» және одан бөлек 12 фильмді ұсынып отыр. Барлығы мемлекеттік қолдаумен түсірілген. Енді 10 күн ішінде барлық қала мен аудан тұрғындары тегін кино көре алады, – деді Жамбыл облыстық Халық шығармашылығы орталығының редакторы Сұлтан Жексен.
Онкүндіктің алғашқы күні Тараз қалалық мәдениет үйінде ұйымдастырылды. Көрерменге «Жамбыл. Жаңа дәуір» фильмі көрсетілді. Бастама аясында ел тарихы мен мәдениетін айшықтайтын фильмдерді таныстыру жалғасады. Мәселен, Кино күндері аясында көрсетілетін «Қажымұқан» ұлттық рухымызды асқақтатса, «Дос-Мұқасан» секілді фильмдер арқылы тұлғалардың жүріп өткен жолына қанығуға мүмкіндік беріледі. Мақсат мемлекеттік қолдаумен түсірілген ұлттық фильмдерді насихаттау, сондай-ақ елді мекендерде тұратын халыққа отандық киноны қолжетімді ету, дейді ұйымдастырушылар.
– Кино орталығының қолдауымен 6 жыл ішінде 117 кино жарыққа шықты. Оның 72-сі – көркем, 37-сі – деректі, 8-і – анимациялық фильм. 2025 жылы 10-15 фильм жарық көреді деп күтілуде, – деді Ұлттық киноны қолдау мемлекеттік орталығының кино жобаларды ілгерілетудің бас менеджері Гүлнұр Қожаахметова.
Онкүндіктің басты жетістігі – қазақ кинолары ауылдарға жетіп, тегін көрсетілуі. Бұл жоба арқылы отандық киноның көкжиегі кеңейіп, қазақстандық киногерлердің жетістіктерімен ел жақыннан танысады деп күтілуде.
Автор: Ләйлә Аманбай
