ТАРАЗДА ЖАСТАР ТЕАТРЫ АШЫЛДЫ

Елімізде мемлекеттік 57 театр бар.  Жалпы саны бойынша бірінші орынды дәстүрлі түрде 23 театр санымен Алматы облысы алып отыр. Екінші орында Астана, ал одан кейін Шымкент. Бұл бағытта өңірімізде ілкімді істер қолға алынып келеді. Тәуелсіздік жылдары көптеген мәдени нысандар бой көтеріп, ел игілігіне берілді. Ал күні кеше Тараз жастар театры ашылды.

Тараз қалалық жастар театры студиясының ашылына орай салтанатты іс-шара өтті. Қалалық жастар театрының «Уақыттан биік әуен» атты қойылымының премьерасы көрерменге ұсынылды.

Әрбір жан театрдан өзіне керек дүниені таба алатыны сөзсіз: онда өмір шындығы да, әзіл де, қайғы-мұң да, ән мен би де, жан тыныштығы да бар. Таңдаулы өнерпаздардың актерлік шеберлігі арқылы образдарды ашып көрсетуі, ең маңызды әрі жауапты іс. Өңірде жастар театрының ашылуы олардың шығармашылығын шыңдауға үлкен сеп болмақ, – дейді облыс басшысы.

Осы студия – соның алғашқы баспалдағы, қарышты қадамы. Осы ордадан дарынды жастарымыз саф өнердің қыр-сырына бойлап, өздерін кеңінен танытуға мол мүмкіндік алмақ. Осы арқылы саланың дамуына үлес қосып, өз алдына жеке театр болып құрылатынына сенімім зор, – деді Жамбыл облысының әкімі Ербол Қарашөкеев.

Мемлекет басшысы Ұлттық құрылтайдың төртінші отырысында Қазақстанда театр өнеріне қызығушылық артып келетініне тоқталған еді. Осы ретте аймақтарда театрларды салу және дамыту бойынша жауаптларға нақты тапсырмалар жүктеген болатын.

 Біз бұл сәтті ұзақ күттік. Осы жастар театры ашылса екен деп талай жерге бардық, талай жерде айтылды. Мінеки, кеше ғана құрылтайда айтылған Мемлекет басшысының сөзінен кейін, облыс әкімінің қолдауымен өңірімізде жастар театры ашылды, – деді ҚР Еңбек сіңірген әртісі Асқарбек Сейілхан.

Театр – өмірлік мәселелерді шешудің жоғарғы сатысы» демекші, адамның бар жан-дүниесін бір қойылым арқылы ақтарып, тіпті кей кезде белгілі бір проблемалардың да шешімін табуға септігін тигізіп әрі шынайы эмоциялар сыйлай отырып, әрбір тұлғаға ой салып, керек кезінде тәрбие беретін сондай бір жұмбақ дүние іспеттес. 

Мен шынымды айтайын, ең соңғы осы Жамбыл облысы деп есептеймін. Ақтөбеде былтыр ашылды, Шымкентте биыл ашылды. Енді бізде ашылып отыр жастар театры. Кәдімгідей бюджет тарапынан ақша бөлінген. Мәдениет басқармасы мен қалалық әкімшілік бізді еш ренжітіп отырған жоқ, – деді ҚР Мәдениет қайраткері, профессор Айгүл Қабиева.

Театрға 20-ға жуық жас жиналған. Түгел өңірлік университет түлектері. Қазіргі уақытта театр өнерпаздары жаңа қойылымға дайындалуда.

Автор: Ләйлә Аманбай