«ЗАҢ МЕН ТӘРТІП – БІЗДІҢ ҰСТАНЫМ» АДАЛДЫҚ САҒАТЫ ӨТТІ
Бүгін Тараз қаласында «Заң мен тәртіп – біздің ұстаным» тақырыбында адалдық сағаты өтті. Шараның негізгі мақсаты – жастардың құқықтық сауаттылығын арттыру, заң талаптарын сақтаудың маңызын түсіндіру және адалдық пен әділдік қағидаттарын насихаттау болды, деп хабарлайды «Taraz24news.kz» ақпараттық агенттігі.
Іс-шараға Тараз қаласы Полиция басқармасы Қоғамдық қауіпсіздік басқармасының Ювеналды полиция бөлімшесінің инспекторы, Полиция басқармасының Қоғамдық қауіпсіздік бөлімі Отбасылық-тұрмыстық зорлық-зомбылыққа қарсы күрес жөніндегі мамандандырылған бөлімшенің инспекторы, халықпен профилактикалық жұмыс жөніндегі маман, заңгер және әлеуметтік қызметкер қатысты.
Кездесу барысында қатысушыларға құқықтық мәдениетті қалыптастыру, қоғамдағы тәртіп пен жауапкершіліктің рөлі, сыбайлас жемқорлықтың алдын алу мәселелері жөнінде ақпарат берілді. Сондай-ақ, адалдық пен әділдікке негізделген азаматтық ұстанымның жеке тұлғаны қалыптастырудағы орны талқыланды.
Шараға қатысушылар өз пікірлерін білдіріп, қойылған сұрақтарына жауап алды. Адалдық сағаты жастардың құқықтық түсінігін кеңейтіп, жауапкершілік сезімін нығайтуға ықпал етті.
