ҚАСЫМ-ЖОМАРТ ТОҚАЕВ ЕКІНШІ «ОРТАЛЫҚ АЗИЯ – РЕСЕЙ» САММИТІНЕ ҚАТЫСТЫ
Мемлекет басшысы Қасым-Жомарт Тоқаев Тәжікстан астанасы Душанбеде өткен екінші «Орталық Азия – Ресей» саммитіне қатысты. Президент қонақжайлық танытып, жиынды жоғары деңгейде ұйымдастырғаны үшін Тәжікстан Президенті Эмомали Рахмонға алғыс білдірді. Сондай-ақ Орталық Азия мен Ресей арасындағы шынайы достық пен стратегиялық серіктестікті дамытуға қосқан үлесі үшін Ресей Президенті Владимир Путинге ризашылығын айтты, деп хабарлайды «Taraz24news.kz» ақпараттық агенттігі, akorda.kz сайтына сілтеме жасап.
Қасым-Жомарт Тоқаев өз сөзінде Орталық Азияның әлеуеті зор аймақ екенін атап өтті. Оның айтуынша, өңірдің жаһандық үдерістердегі рөлі жылдан жылға артып келеді. Президент Ресейдің Қазақстан үшін маңызды стратегиялық серіктес әрі одақтас ел екенін, екі ел арасын әлемдегі ең ұзын шекара – 7591 шақырым бөліп жатқанын атап өтті.
Мемлекет басшысы үш жыл бұрын Астанада өткен алғашқы саммиттің көпжақты ықпалдастықтың сәтті бастауы болғанын еске алып, бүгінгі кездесу екіжақты және өңірлік байланыстарға жаңа серпін беретініне тоқталды.
Президенттің айтуынша, аймақ елдері мен Ресей арасындағы ынтымақтастықтың басты бағыттарының бірі – сауда және индустриялық байланыстарды дамыту. Ол бұл бағытта қабылданған Бірлескен іс-қимыл жоспары 50-ден астам шараны қамтитынын, оның уақтылы орындалуы маңызды екенін айтты.
Мемлекет басшысы ауыл шаруашылығы, көлік-логистика, энергетика және цифрлық технологиялар саласындағы өзара іс-қимылды күшейту қажеттігін де атап өтті. Президент Орталық Азия мен Ресейдің көлік дәліздерін дамыту, соның ішінде «Солтүстік – Оңтүстік» және «Батыс Еуропа – Батыс Қытай» бағыттарын кеңейту бойынша бірлескен жобаларды жүзеге асырудың маңызын айтты.
Қасым-Жомарт Тоқаев энергетика саласындағы серіктестікке жоғары баға беріп, үшжақты газ одағы мен атом энергетикасы бағытындағы бірлескен бастамалар өңірдің энергетикалық қауіпсіздігін нығайтатынын айтты.
Президент цифрлық трансформация мен жасанды интеллект технологияларын енгізу мәселелеріне де назар аударып, бұл салада Ресеймен тәжірибе алмасу және бірлескен жобаларды іске асыру қажеттігін айтты.
Сонымен қатар Мемлекет басшысы экологиялық қауіпсіздік, су ресурстарын тиімді пайдалану және мәдени-гуманитарлық байланыстарды дамыту мәселелерін көтерді. Ол орыс тілінің ортақ мәдени құндылық ретінде маңызын атап өтті, бірақ қазақ тілінің мемлекеттік мәртебесі мен қолдау саясатының одан әрі жалғасатынын баса айтты.
Жиында сондай-ақ Тәжікстан Президенті Эмомали Рахмон, Ресей Президенті Владимир Путин, Қырғызстан Президенті Садыр Жапаров, Түрікменстан Президенті Сердар Бердімұхамедов және Өзбекстан Президенті Шавкат Мирзиёев сөз сөйледі.
Қасым-Жомарт Тоқаев Душанбеде өткен саммиттің нәтижесі Орталық Азия мен Ресей арасындағы тұрақтылық пен өркендеу жолындағы ынтымақтастықтың жаңа кезеңіне жол ашатынына сенім білдірді.
