ЖОЛДАУ-2024 ЖҮЗЕГЕ АСЫРУ: ОТАНДЫҚ ӨНДІРІС ӨСІМІ ЖӘНЕ ШОБ ҚОЛДАУ
Президент Қасым-Жомарт Тоқаевтың 2024 жылғы Жолдауындағы тапсырмаларды орындау Үкімет үшін басым бағыт болып отыр. Отандық өндірісті қолдау, капитал тарту және шағын бизнеске жағдай жасау шаралары жалғасуда, – деп хабарлайды “Taraz24news.kz” ақпараттық агенттігі primeminister.kz сайтына сілтеме жасап.
Үкіметтің басты мақсаты – бизнес үшін бәсекеге қабілетті орта қалыптастыру және кәсіпкерлерге айқын әрі болжамды ережелер ұсыну.
ӨТКІЗУ ТЕТІКТЕРІ ЖӘНЕ ҰЗАҚМЕРЗІМДІ ШАРТТАР
Отандық кәсіпорындарды қолдау үшін реттелетін сатып алулар көлемі артып, ұзақмерзімді келісімшарттар мен офтейк-шарттар енгізілді. 2025 жылдың алғашқы жартысында 333,4 млрд теңгеге 106 мыңнан астам келісім жасалды, бұл өткен жылмен салыстырғанда екі еседен аса өсім көрсетеді.
ОТАНДЫҚ ӨНДІРУШІЛЕР ТІЗІЛІМІ
Қазіргі таңда қазақстандық тауар өндірушілердің бірыңғай тізілімі құрылып жатыр. Жүйе толық іске қосылғаннан кейін (2026 жылғы 1 қаңтар), тек расталған өндірісі бар кәсіпорындар ғана мемлекеттік қолдау мен сатып алуларға қол жеткізетін болады.
ІРІ КӘСІПОРЫНДАРДЫҢ ҮЛЕСІ
«Самұрық-Қазына» қоры еншілес компаниялары арқылы 2025 жылдың алғашқы алты айында 230,3 млрд теңгеге 417 келісімшарт жасалды. Жер қойнауын пайдаланушылар да белсенді: 2025 жылдың бірінші жартысында 901,4 млрд теңгеге 551 келісімшарт рәсімдеген.
ШАҒЫН ЖӘНЕ ОРТА БИЗНЕСТІ ҚОЛДАУ
2024 жылы «Даму» қоры арқылы 17 мыңнан астам жоба 1 трлн теңге көлемінде жеңілдетілген қаржыландыруға қол жеткізді. 2025 жылы қосымша 271 млрд теңге бөлу жоспарланып отыр. Сонымен қатар, кепілдік беру жүйесі кеңейтілді: 2025 жылдан бастап «Даму» қоры аясында ірі жобаларға да, шағын кәсіпорындарға да арналған жаңа кепілдік тетіктер іске қосылды.
«ӨРЛЕУ» ЖАҢА БАҒДАРЛАМАСЫ
Биыл инвестициялар мен жұмыспен қамтуды ынталандыру мақсатында «Өрлеу» бағдарламасы басталды. Ол банктер мен «Даму» қорының бірлескен қаржыландыруымен жеңілдетілген қарыздар беруді көздейді.
ЦИФРЛАНДЫРУ ЖӘНЕ ЖАҢА РЕТТЕУШІЛІК САЯСАТ
Кәсіпкерлер үшін eGov Business қосымшасы іске қосылып, салық күнтізбесі, электронды сертификаттар мен цифрлық қолтаңба сияқты қызметтер автоматтандырылды. Сонымен қатар, «реттеуші гильотина» және «прокурорлық сүзгі» қағидаттары енгізіліп, бизнесті артық талаптардан босатуға жол ашылды.
Жалпы алғанда, 2024 жылғы жолдау аясында қолға алынған шаралар отандық өндіріс көлемін арттырып, ШОБ-тың экономикадағы үлесін ұлғайтуға және кәсіпкерлерге қолайлы бизнес-ортаны қамтамасыз етуге бағытталған
