ОЛЖАС БЕКТЕНОВ ФАРМАЦЕВТИКА САЛАСЫН ДАМЫТУ МӘСЕЛЕЛЕРІН ТАЛҚЫЛАДЫ
Премьер-министр Олжас Бектенов отандық фармацевтикалық және медициналық өнеркәсіпті дамытуға арналған Отандық кәсіпкерлер кеңесінің отырысын өткізді, — деп хабарлайды «Taraz24news.kz» ақпараттық порталы.
Жиын Мемлекет басшысының тиісті тапсырмаларын орындау аясында ұйымдастырылып, оған мемлекеттік органдар, «Атамекен» ҰКП, салалық қауымдастықтар және бизнес өкілдері қатысты.
Отырыста Олжас Бектенов денсаулық сақтау мен фармацевтика саласының ел экономикасы мен халық өмір сапасына тікелей әсер ететінін атап өтті. Оның айтуынша, адам капиталын дамыту – мемлекеттің стратегиялық бағыты ретінде айқын бекітілген.
«Атамекен» ҰКП деректеріне сәйкес, елімізде 200-ден астам фармацевтикалық және медициналық өнім өндіруші бар. Отандық компаниялармен мыңдаған өнім түрін жеткізуге ұзақмерзімді келісімшарттар жасалған.
Соңғы жылдары фармацевтика өндірісі өсім көрсетіп отыр. Бағаны реттеу және дәрі-дәрмек нарығын тұрақтандыру бағытында да бірқатар шаралар қабылданған. Нәтижесінде кейбір дәрілердің бағасы орта есеппен төмендеген.
Сонымен қатар дәрі-дәрмекті тіркеу мен нарыққа шығару үдерісін жеңілдету үшін «бір терезе» қағидатын енгізу жұмыстары жүргізілуде. Бұл жүйе саланың ашықтығын арттырып, рәсімдерді жеделдетуге бағытталған.
Отырыста отандық өндірушілерді қолдау, ұзақмерзімді келісімшарттар тәжірибесін кеңейту, баға белгілеу тетіктерін жетілдіру және медициналық техника өндірісін дамыту мәселелері көтерілді.
Денсаулық сақтау министрлігі дәрі-дәрмекпен қамтамасыз ету жүйесін цифрландыру және бағаны төмендету бағытындағы реформалар жалғасып жатқанын мәлімдеді. Сондай-ақ мемлекеттік сатып алуларда айтарлықтай бюджет үнемделгені айтылды.
Премьер-министр мемлекет пен бизнестің бірлескен жұмысы маңызды екенін атап өтіп, отандық өндірісті қолдау басым бағыт болып қала беретінін жеткізді.
Отырыс қорытындысында Үкімет бірқатар нақты тапсырмалар берді: дәрі-дәрмекті тіркеуді «бір терезе» арқылы енгізу, баға реттеу жүйесін кезең-кезеңімен қайта қарау, отандық өнімге әділ баға қалыптастыру, сондай-ақ салықтық және ұзақмерзімді келісімшарт тетіктерін жетілдіру.
