КОНСТИТУЦИЯҒА 30 ЖЫЛ: ТАРАЗДА ЖАҢА КІТАПХАНА АШЫЛДЫ

Қазақстан Республикасы Конституциясының 30 жылдығына орай Тараз қаласындағы «Ұлы дала» шағынауданында жаңа кітапхана ашылды, деп хабарлайды «Taraz24news.kz» ақпараттық агенттігі, облыс әкімдігінің баспасөз қызметіне сілтеме жасап.

Салтанатты шараға қала әкімі Бақытжан Орынбеков, зиялы қауым өкілдері мен жергілікті тұрғындар қатысты. Іс-шара барысында шаһар басшысы ұлт руханиятын дамыту мемлекеттік саясаттың маңызды бағыттарының бірі екенін атап өтті.

Сонымен қатар жазушы, драматург, публицист, «Алаш» әдеби сыйлығының лауреаты Елен Әлімжан, Қазақстанның еңбек сіңірген қайраткері, Тараз қаласының Құрметті азаматы Қайырбек Асанов және Қазақстанның еңбек сіңірген қайраткері, «Алаш» сыйлығының иегері Көсемәлі Сәттібайұлы құттықтау сөз сөйлеп, тұрғындарға ізгі тілектерін жеткізді.

45 мыңнан астам тұрғыны бар шағынауданда орналасқан жаңа кітапхана 400 шаршы метр аумақты алып жатыр. Мекеменің кітап қоры – 41 мың дана. Мұнда оқырмандарға абонемент бөлімі, оқу залы және «Коворкинг» орталығы қызмет көрсетеді. Жаңа нысан тұрғындардың бос уақытын тиімді өткізуге мүмкіндік береді.

Бүгінде Тараз қаласы аумағындағы 17 кітапханада жалпы кітап қоры 495 мыңнан астам дананы құрап отыр.