«ҚАЗАҚСТАН БАРЫСЫ» ОБЛЫСТЫҚ ТУРНИРІНЕ ІРІКТЕУ

Ұлттық спорт күні  Таразда «Қазақстан барысы» облыстық турниріне іріктеу жарысы өтті. Дәстүрге айналған сайыста чемпион атану үшін өңірдің үздік 73 балуаны бас қосты. Спортшылар 8 салмақта және абсолюттік салмақ дәрежесі бойынша сынға түсті.

Наурызнама онкүндігі аясында 20 наурыз – «Ұлттық спорт күні». Бұл мейрам халқымыздың ғасырлар бойы қалыптасқан ұлттық ойындарын дәріптеуге, салт-дәстүрімізді жаңғыртуға және жас ұрпақты ата-баба мұрасын құрметтеуге шақыруға арналған. «Қазақстан барысы» республикалық байқауы да соның айқын дәлелі, – дейді ұйымдастырушылар.

– Тараз қаласы әкімдігінің спорт бөлімінің ұйымдастыруымен бүгін өздеріңіз куә болып отырғандай, «Қазақстан барысы» қалалық турнирі өтіп жатыр. Біз осы азаматтарға облыстық турнирден жеңіспен оралуына тілектеспіз, – деді Тараз қаласы әкімінің орынбасары Ұлана Сланбекова.

Турнир алдымен аудан балуандарының іріктеуінен басталды. Енді ол қала деңгейінде жалғасуда. Қалалық турнирде 1, 2, 3-орын алған түйе балуандар 5-6 мамырда өтетін облыстық іріктеуге қатысады. Жалпы, «Қазақстан барысы» турнирінде өңір намысын ауданнан – 2, шаһардан – 3 балуан қорғайтын болады.

– Менің жарысқа келудегі басты мақсатым – чемпион атанып, ауылға жеңіспен оралу. Қарсыластарыма сәттілік, өзіме жеңіс тілеймін! Чемпион болсам деймін, бұйыртса, – деді спортшы Мұрагер Базарбай.

Айта кетейік, жеңімпаз спортшылар қала әкімдігінің медальдары, дипломдары, кубоктары және естелік сыйлықтарымен марапатталды. Ал абсолюттік салмақ дәрежесінде жүлдегер атанған балуандарға ақшалай сыйлықтар табысталды:
І орын – 300 000 тг, ІІ орын – 200 000 тг, ІІІ орын – 100 000 тг.

Автор: Зарина Мырзашева