ҚАЗАҚСТАН ҮКІМЕТІ ҚАРАҒАНДЫ ОБЛЫСЫНДА ҚҰНЫ 42,5 МЛРД ТЕҢГЕ БОЛАТЫН ФАРМАЦЕВТИКАЛЫҚ ЗАУЫТ САЛУ ЖОБАСЫН МАҚҰЛДАДЫ
Қазақстан Үкіметі Қарағанды облысында құны 42,5 миллиард теңгені құрайтын фармацевтикалық зауыт салу жобасын мақұлдады. Бұл бастама Мемлекет басшысы Қасым-Жомарт Тоқаевтың импортты алмастыру және отандық дәрі өндірісін дамыту жөніндегі тапсырмаларын орындау аясында жүзеге асырылып отыр, — деп хабарлайды «Taraz24news» ақпараттық порталы.
Тиісті инвестициялық келісім Қазақстан Республикасының Үкіметі пен Қарағанды фармацевтикалық кешені арасында жасалып, оны Олжас Бектенов бекітті.
Жобаға салынатын жеке инвестиция көлемі 42,5 млрд теңге. Ол елдегі фармацевтика өндірісін кеңейтуге, өндірісті жергіліктендіруге және жоғары технологиялы бағыттарды дамытуға бағытталған ірі бастамалардың бірі болмақ.
Жаңа зауытта 74 түрлі дәрілік препарат шығару жоспарланып отыр. Өндіріс желісі онкология, аутоиммунды және сирек кездесетін (орфандық) ауруларды емдеуге арналған инновациялық дәрілерді қамтиды. Сонымен қатар иммунобиологиялық және биотехнологиялық өнімдер өндірісі жолға қойылмақ.
Жоба аясында белсенді фармацевтикалық ингредиенттерді, биологиялық және биотехнологиялық өнімдерді синтездеу де қарастырылған. Бұл бағыт елдің дәрілік қауіпсіздігін күшейтуге және ішкі нарықты отандық өніммен қамтамасыз етуге ықпал етпек.
Жоба толық іске қосылғанда Қарағандыда шамамен 70 жаңа жұмыс орны ашылады.
Жалпы алғанда, Қазақстанның фармацевтика саласы өсім көрсетіп отыр. Соңғы деректерге сәйкес, өндіріс көлемі 8,7 пайызға артып, 191,1 млрд теңгеге жеткен. Инвестиция көлемі де өсіп, 142,8 млн АҚШ долларына дейін ұлғайған. Сондай-ақ жалпы құны 360 млрд теңгеге жететін бірнеше инвестициялық келісімдер жасалып, жүздеген жаңа дәрі түрін өндіру және мыңнан астам жұмыс орнын ашу жоспарланып отыр.
